منصور العيسوي احنا معندناش قناصه

هكتب تدوينه صغيره كدا عن وزير داخليتنا اللي جه بعد تنحي مبارك عشان انا بجد مفقوعه منه بقعد في كل مره يظهر فيها علي التلفزيون اسمعه سبحان الله بلاقيهم كلهم زي بعض كلهم بيبقي عندهم نفس البق شكلهم بيستلفوه من بعض ما عالينا في تدوينه تانيه هبقي اكتب واحلل من وجهه نظري شخصيه المواطن المصري عندما يعتلي منصب بجد بيقلبه شبه بعض بطريقه مثيره للضحك واحيانا للسخريه... خلينا بقي مع السيد منصور العيسوي وبالخص تصريحاته اللولبيه الفذه بعد احداث مليونيه ١٨نوفمبر والاحداث اللي توالت من الاعتصام في التحرير لحد النهارده ٢٤ نوڤمبر وبالاخص شارع محمد محمود اللي ناس كتير فيه ماتت ملحوظه الشارع دا مرشق ظباط وعساكر امن مركزي واسلاك شائكه وخلافه اكتبلكوا بقي تصريحات السيد العيسوي للذكري الخالده وباردوا للبرود الخالد اللي متمتع بيه اللي بيمسكوا مناصب في قلب هذا الوطن العيسوي اسم النبي حارسه وصاينه قال : ما فيش رصاص اتضرب في التحرير سواء حي أو مطاطي ومافيش حد اتصاب (مش فاهمه صراحه والناس اللي عينيها طارت دي من ايه كل واحد راح استلف مفك من عند الميكانيكي وخرم بيه عينه.!!!جايز. العيسوي قال باردوا:: إللي جر جثة ورماها في الزبالة ده هو لقى جثة مرمية فنص الشارع والناس بتعدي عليها فشاله وحطه على جنب عشان محدش يدوس عليه (شوفوا يا جماعه ماشاء الله علي اساس انهم ماشاء الله قلبهم رهيف كدا ويعرفوا كويس قوي حقوق الحيوان والانسان بلا اختلاف ابدا) العيسوي كمان ٣مرات قال : الغاز المستخدم في ميدان التحرير الان افيد واقل خطراً علي المتاظاهرين وغير سام او محرم دوليا ومعندناش غاز منتهي الصلاحية والغاز منتهي الصلاحية فعاليته أقل (والناس اللي اتخنقت دي ايه لفه بعض بالايشاربات وقاموا مكممين انفاس بعض ..!!) العيسوي كلاكيت رابع مره قال : اللي بيضربوا نار من اسطح البنايات بتوع مخدرات ومسجلين خطر مافيش ضرب من ظباطنا (طب يا جناب الوزير المحترم سايبينهم متلقحين ليه فوق اسطح البيانات ظباطك الاكفاء مقبضوش عليهم ليه!! واللا هما مش فالحين في غير في ضرب العزل!!!!! وفي نهايه الحديث احنا ماعندناش وزاره اسمها داخليه من اساسه ياحيا الهطل المغلف بالهبل المحلي المنفردين بيه نحن فقط بلا اي تنتوفه منازع والله وعزه جلال الله انا فعلا بشك في نوع الاكل اللي احنا بناكل ومتوارث عبر الاجيال وبمناسبه اتصريحات العيسوي اللولبيه احب اختم التدوينه دي باغنيه: حلاوه شمسنا وخفه ظلنا الدنيا عدنا هطل طول السنه. دمتم في امان الله ورعايته ورحمته ورأفته بحالنا الذي حقا يرثي له

مباركات في كل شارع في بلادي

اهم انجازات ثوره ٢٥ يناير  لحد دلوقتي هو الغاء التوقيت الصيفي وبس                                بس اه بس و مفيش اي انجاز تاني  اه شيلنا مبارك و الشله الغير لكريمه دا حقيقي و الحمدلله بس بس  موجود مباركات كتير في كل شارع في بلادي..:) يا صلاه النبي علينا وعلي حوالينا واحنا سلوكياتنا زي ما هي بالا اي تبديل او محاوله اصلاح في كل واحد فينا هتلاقي مبارك صغير او كبير بيترنح جواه ماهو كبره وصغره بيختلف من شخص لاخر المهم ان كل واحد فينا فيه هذا الشخص باختلاف ملامحه جواك بس اقعد بينك وبين نفسك ودور كدا هتلاقيه جواك لما ترفض سماع الراي الاخر يبقي مبارك جواك لما تتهكم وتتريق علي الاخر لما تحس ان رايك هو الصح وتبقي متاكد منه كمان بلا اي قبول للنقاش لما تحس انك لوحدك الفكيك اللي موجود وان اللي حواليك كلهم بهايم لما تحس انك افضل من غيرك سواء دينيا او ثقافيا او علميا تبقي انت ايه شوف كدا وقولي لحسن انا ماعنديش وصف تاني لما تختلف مع حد في رايه فتقوم شتمه ونعته باجمل الالفاظ التعبيريه وبعدين تقولي دي حريه شخصيه اقول اللي انا عاوزه لا يا عزيزي دي ماسمهاش حريه شخصيه دي اسمها قله ادب وعدم ربايه لما ماتقفش تعدي خلق الله وانت راكب عربيتك ولما تلاقي حد وقف عشان يعديهم تقعد تزمر وتشتم عشان ازاي جنابك اتعطلت ٣ ثواني في تعديه خلق الله لما تبقي قاعد مرزوع وانت في الاتوبيس وشايف راجل كبير او ست سواء كانت كبيره او صغيره بلا اي اكتراث او ادب لما تقعد تبحلق في خلق الله من النساء وبعدين تقوليه اصل هي اللي جايباه لنفسها لانها مش محترمه وشوفوا لبسها ازاي ونسيت وتناسيت او استهبلت ان فيه حاجه اسمها غض البصر اللي ربنا امرك بيه لما تزعق وانت في الشارع وتشتم الفاظ تقرف وتقولي دي حريه شخصيه يااااه دي فيه حاجات اكتر ان الواحد بيشوفها ويسمعها كل اربع ثواني في جميع انحاء المحروسه المحروسه اللي نفسنا كلنا تتغير وتبقي كما يجب ان تكون بس هي مش هتكون لوحدها كدا ماهو لازم الشعب اللي عايش علي ارضها يتغير ويحاول انه يبقي حاجه ويساعد الناس اللي مش عارفه نفسي مصر تبقي شبيها بالمدينه الفاضله او بلاش الفاضله لان دي هتبقي واسعه تلات حبات فخلينا نقول بالمدينه المتحضره و المتقدمه و الدوله اللي بتحترم شعبها من اصغرهم لاكبرهم من افقرهم لاغناهم من علماءها لجهالها و لو اني نفسي مايبقاش في جاهل واحد في المحروسه و لا امي واحد تفتكروا دا حلم بعيد و اللا قريب ان مأمنه ان مفيش حاجه اسمها مستحيل بعد ما مبارك مشي هو و الحاشيه الكريمه مابقاش في حاجه اسمها مستحيل بس محتاجين نساعد بعض و ايدينا في ايدين بعض عشان مايجيش مبارك اخر و نقضي علي المباركات اللي منتشرين في كل شارع في بلادي .. الله يحميكي يا بلادي واصحي مالاقيكيش اي مبارك في اي شارع في بلادي

وحوش تحكم وحوش

اتنطبق هذه الكلمه علينا حقا نحن الشعوب العربيه انا هخص الكلام دا علينا نحن العرب فقط لان هم دوول اللي يهموني و يخصوني مايخصنيش خصائص صفات الانسان الغربي ولو ان الانسان خصائصه مشتركه باختلاف جنسه او دينه
نرجع تاني للانسان العربي ومقوله اننا كشعوب عربيه وحوش تحكمنا وحوش وكم الغل والانتقام اللي مالينا من كل اتجاه نعم نحن شعوب عانت معاناه مريره من حكامها من ظلم وفقر وجهل واضطهاد واستبداد بدرجات مختلفه ولكن كلنا مشتركين فيها ولكن محتاجه حد يفهمني منين انا كمواطن عربي اشتكي من كل هذا واثور علي مستبديني وعلي الذين لا يحترمون ادميتي ولكن عندما تسنح لي الفرصه اتصرف بنفس الطريقه اللي بشتكي منها وعانيت منها واتعذبت واتقهرت وظلمت منها ازاي..!!! ولما تيجي تكلم حد يقولك انت ماعنتش زي ما انا عنيت انت لو عنيت كنت عملت اكتر من كدا..!!! طب وبتنادي ليه حضرتك بالعداله !!! اي عداله هذه بالله عليكم وانتم لا تسمعون غير صوت غلكم وانتقامكم بلا عقل!!!! ايعرف ان قلوبنا مليئه بالغل علي حكامنا واللي عملوه فينا ولكن دائره الانتقام ان تركت بلا لجام ستاكل وتلتهم وتفتك بكل شئ وهنبقي عايشين في غابه بلا رابط وبلا ظابط
ابسط حاجه اللي حصل للقذافي .. هو قاتل لشعبه نعم ومستبيح اعراضهم ودمائهم نعم ويجب قتله نعم لان من قتل يقتل ولكم في القصاص حياه يا اولي الالباب ودا مذكور في كتاب الله ولكن وقفه مين قال ان السحل و التمثيل بالجسد وتصوير الميت وعرضه في مكان لمشاهدته وهو ميت وممثل به جسديا ذكر في القران ويرضي عنه الله ورسوله لا انتم فاهمين غلط ربنا استحاله يرضي عن هذا ابدا دينا الاسلامي برئ من هذه الافعال المشينه المثيره للغثيان سيد الخلق كان بيقول للصحابه : اغزوا باسم الله وفي سبيل الله وقاتلوا من كفر بالله اغزوا لا تغلوا ولا تغدروا ولا تمثلوا. بس نقطه ومن اول السطر اللي عملوا من قبضوا علي القذافي والتهليل والرقص علي جثته وعدم سماحهم بدفنه الي الان لا يمت لتعاليم دينا بصله . اللي قبض علي القذافي قال انهارده ان هم مسكوه حي وان بعض من الثوار اتخنقوا عشان كل واحد عايز ياخده فقام هذا الفتي بقتله ..!! يعني كان حي وقتلتوه طب بعدالقتل لما التمثيل بالجثه لما عدم السماح بدفنه
طبعا لا اجابه والاعجب ان ناس كتير تحلل ما حدث وانه شئ عادي ...!!
وبعد كدا دوول لما يتولوا الحكم لا استبعد ان يفعلوا بشعوبهم ما فعلوه حكامنا بنا هي حلقه مفرغه كلنا ندور فيها بلا وعي ونحلل فيها ما نفعله كما فعل وحلل حكامنا ما فعلوه بشعوبهم ...
حقا اننا وحوش تحكمنا وحوش وسوف نحكم بمبدأ الوحوش الذين حكمونا..:(
حق
 

احرار سوريا

هذه تدوينه من مصريه اخصها الي شعب سوريا العظيم كم انت حقا شعب تستحق كل التقدير و الاحترام علي هذا الصمود ..يقولون ان نحن كشعب مصري بعد ان قمنا بثورتنا نستحق جائزه نوبل ولكني اقول و بكل حب انكم من تستحقونها علي هذا الصمود و البساله ضد الطغيان الاسدي.. لكم الله و باذن الله ان فرجه لقريب كم احب هذا الشعب حقا و اعذروني لعدم مقدرتي علي مساندتك الا بالكلمات ..

الديمقراطيه الشكليه

يستوقني كثيرا المطالبين و الصارخين ومن كتر صراخهم شايفين لوازهم بتطبيق الديمقراطيه و تحس من كتر مهما بيزعقوا تحس ان ارواحهم هطير من كتر تمنيهم بتطبيقها و لكن يتبدد عندي هذا الاحساس عندما اراهم بيتكلموا مع احد من معارضي ارائهم ايين كانت هذه الاراء صائبه او خاطئه ووصل الردح المتميزين فيها وبيها ..المشكله الكامنه اصلا مش في صواب الراي او عدمه انما كامنه في طريقه التعبير عن الراي اللي انا عايزه اوصله للعامه و عدم تقبلي لاي رأي غير رأيي و هو دا اللي الاغلبيه بتعمله و تنادي بيه يعني المفروض اللي بيطالبوا بتطبيق الديمقراطيه يزودوا عليها كام كلمه كدا عشان نفهم و يكونوا صادقين و يحطوا كل كلمه في موضعها الصحيح يعني يقولوا نود تطبيق الديمقراطيه من وجهه نظرنا الا و هي ارائنا فقط التي نؤمن بانها صائبه و لا تحتمل ولا تقبل النقاش و الاعتراض عليها دا يبقي انتوا كده تمام و الناس عرفت ان انتوا عايزين تطبقوا الديكتاتوريه التي لا تختلف عن العصور السابقه البته بس كداو تبقوا استريحتوا وريحتوا اللي هيجنن لما بيشوفكوا بتزعقوا علي حاجه استحاله هطبقوها و دا مش عيب فيكوا دا عيب في طريقه تربيه و موروثات و ثقافات متربيين عليها من عصور قديمه الازل يعني احنا شيلنا ديكتاتور وحطينا ملايين من الديكتاتوريين مفيش فرق يعني خالص الفرق فقط في اسامي الاشخاص و بس ياريت كل واحد عنده ابن يمارس معاه في البيت وهو صغير انه يناقشه ويختلف معاه ويحترم اختلافه معاه ويتحاور معاه ويسمع منه لان بدا يمكن نطلع اجيال تستوعب معني كلمه ديمقراطيه بمقهومها الصحيح وبالتالي مش هنشوف كميه التزمت والزعيق والردح اللي بنشوفه دلوقتي ودا مش عيب فيهم لان هما ماتربوش علي دا في بيوتهم وهم اطفال الله يسامح اهاليهم حقا ويصبر مصر علي الاجيال اللي عايشه فيها ويمنح مصر جيل متربي صح علي اسس التربيه الصحيحه وجيل يبقي اغلب اسوياء مش المناظر اللي بنشوفها لكي الله يا مصر بكل ما تحمل هذه الكلمه من معني