وبعدين (١)

اهو جه اليوم اهو اتحولنا من تخوين اللي في ميدان في عصرمبارك لتخوين اللي في الميدان في عهد مرسي
ومن السخريه انك كل ما تكلم مؤيد للاعلان الدستوري اللي مرسي حصن فيها قرارته وجعلها غير قابله للطعن تلاقي حد فيهم لما تقول انك معترض كمواطن غير متقبل للديكتاتوريه باي شكل من اشكالها وحتي لو كانت ربع دقيقه من عمرك مش مؤقته فقط انك بكدا بتحارب الشريعه ومش عاوزتطبيق شرع الله..!!!
فين شرع الله في البيان الدستوري الاخير دا مش واخده بالي صراحه ... ما اعمق العبث الكلامي في حياتنا
وباللهجه الدارجه اي كلام والسلام يا سيد والله وحافظ مش فاهم جناب سعادتك
اللي بيقول ان اللي في التحرير دوول فلول واذناب
النظام السابق ومؤيدين شفيق وولاد مبارك وولاد البرادعي وبلا بلا بلا
النسبه اللي صوتت لشفيق هي ٤٩٪
يعني احنا عندنا٤٩ ٪ من شعب مصر فلول واذناب النظام السابق طب ما جنابكم اعلنوا عليهم الحرب بقي وابيدوهم ما تنسوش وسيبوا بس علي ارض مصر الاخوان والسلفيين ومؤيدينهم فقط لا غير اللي لو نزلوا هيبقوا مليونيات مش مليون وكدا يعني مدام كل ما اكلم حد يصنفلي الموضوع بالطريقه الغريبه دي .....طيب وللتذكير النسبه اللي اخدها مرسي هي ٥١ ٪ منهم اصوات استحاله كانت تديله صوتها لما تتطربق السما علي الارض واديتهالوا فقط لوجود شفيق عِنْد في شفيق يعني من الاخر ودا كان شئ واضح ومعلون ماشي مش حباً وغراما لمرسي ماتعيشوش الحلم دا كتير لان مش مستوعباكوا صراحه وماعنديش نيه لاستيعابكم لو كانت الاصوات دي وانا منهم كانت اديت لشفيق والله تلاته مرسي ما كان شاف ربع كرسي الرئاسه ولا كان مر من قدام الاتحاديه فربنا أمر ان يكون حظه كدا فقط لا غير فياريت يا حبذا تفوقوا من الوهم اللي انتم عايشين فيه لان كل واحد بيتكلم علي اساس ان دا مش واقع كانت مصر عايشاه واحنا عايشينه وياماشاء الله مرسي واخد تاييد كل الشعب واللي نازل يعارضوا بقوا فجاه كلهم فلول وحثاله
كلنا مصريين مسيحين اخوان علمانيين سلفيين كفار حتي كفايه شتيمه في كل فصيل مش عاجب جنابك او مابتنتميش ليه وعايزين البلد تقوم وتقف علي رجليها ازاي وانتم مابتعملوش حاجه غير شتيمه وتخوين وتحقير واهانه واستفزاز ومعايره بعض بس ومصر بقت صفين صف هنا وصف هناك وواقفين لبعض بطريقه مقرفه فعلا
عيب عيب بجد
استقيموا يرحمكم الله